الطعام الكورى

من قديم الازل اعتبر الكوريين القدامى ان الطعام اللى قيمته الغذائيه عاليه اهم من الدواء وان الدواء بييجي في المرتبه التانيه بعد استخدام الطعام فى العلاج علشان كدا بدأوا يتفننوا في صناعه الاكل باستخدام كتير من انواع الخضروات المختلفه و كتير من التوابل الي قيمتها الغذائيه عاليه والاهتمام بالمطبخ الكورى و خصوصا المطبخ الملكي علشان كدا ظهر نوع من اهم انواع الثقافه الكوريه و هي ثقافه الطعام الكورى K-food))

لو جينا نشوف السفره الكوريه هنلاقي الارز هو الطبق الرئيسي وهنلاقي انواع كتير من الشوربه المختلفه اما بالنسبه للاطباق الجانبيه فدي بتجمع  مجموعه من الخضروات ذات القيمه الغذائيه العاليه وكان عددها في الماضي من 3 الي 5 اطباق نظرا للحاله الاقتصاديه السيئه 

حديثا بنلاقي السفره بتتكون من الارز و الشوربه و الكيمشي ومجموعه اكتر من الاطباق الجانبيه الي داخل فيها اللحم او السمك الي جانب الخضروات والي ممكن يوصل عددها ل 12 طبق جانبي

*دلوقتي هانبدا نتكلم علي اشهر اطباق المطبخ الكوري و هنبدا اولا بالكيمتشي (kimichi) والي بيدخل في صناعته عمليه التخمر الي بيفضلوا استخدامها في صناعه الاكل الكوري لانها بتحسن من الطعم و بتعلي القيمه الغذائيه دا غير ان وقتها الاكل بيستحمل عمليه التخزين الطويله,وبيعتبر الكرنب الكوري المكون الرئيسى للكيميشى مع بعض الاضافات المهمه زي معجون الفلفل الاحمر مع الثوم و البصل و الزنجبيل الكوري و صوص السمك و بتم عمليه التخمر الي بتاخد من عده ايام لسنه و الكيمتشي له انواع مختلفه باختلاف المكونات الداخله في تكوينه و الي بتختلف من بلد لبلد داخل كوريا

في سنه 2006 نشرت مجله صحيه عالميه عن الكيمتشي و اعتبرته من افضل خمس اطعمه صحيه في العالم

*تاني طبق هنتكلم عنه هو الكيمباب Kimbap)) باب يعني ارز بالكوري و كيم يعني طحالب ودا بيوضح تكوين النوع دا من الاطباق و بيدخل فيه كمان انواع مختلفه من الخضروات و البيض المقلي و ممكن التونه وكل دا بيتخلط بالارز و بيتلف بالطحالب ودا بيعد من اكتر الاطباق الشعبيه ذات القيمه الغذائيه العاليه ومن اهم الاطباق الثلاث المقدمه في كوريا مع الكيمتشي و البولجوجي

*ثالت طبق هنتكلم عنه هو البولجوجي Bulgogi)) ودا نوع من الاطباق الكوريه التقليديه و بيكون اللحم هو المكون الاساسي ليه اما لحم بقري او لحم الخنزير و بيقطع شرائح وبيتقدم مشوي مع الصوياصوص وانواع كتير من التوابل عاليه الفايده و مؤخرا في كوريا بدا البولجوجي يدخل في الاكل السريع (Fast food)وعملوا برجر منه و كمان بيتزا البولجوجي

*رابع طبق هنتكلم عنه هو التتوكبوك كي Tteokbokky)) او كعكه الارز الحاره و بتتكون من كعكه الارز اللزجه المعموله من بودره الارز المدخن المعجونه و المعموله علي شكل اسطواني و بتتخلط علي النار بمجموعه من التوابل الحاره والحلوه ومع الخضروات زي البصل و الجزر و معجون الفلفل الاحمر مع مرقه السمك و بيتقدم في الافراح و المناسبات و الاعياد

*خامس طبق هنتكلم عنه هو العصيده Juk)) العصيده الكوريه بتتعمل من انواع مختلفه من الحبوب و تقدم للاطفال و الكبار الي بيعانوا من مشاكل في الهضم و مؤخرا ظهرت كتير من مطاعم العصيده في كوريا و بيعملوا العصيده بصوره شهيه و مفيده و بيدخل في صناعتها مجموعه كبيره من الخضروات المفيده الي جانب الحبوب الداخله في صناعتها  

*سادس طبق هنتكلم عنه هو الشعريه الكوريه Noodles)) دا بقي ليه انواع كتير في كوريا علي حسب الاضافات المستخدمه مع الشعريه ومن اطباق الشعريه الشهيره في كوريا الجاجميون و دا طبق شعريه بمعجون الصويا صوص و طبق الشعريه البارده و طبق الراميون المشهور في كتير من الدراما الكوريه, طبق الشعريه عموما من اهم تقاليد الزواج الكوري فلما حد يسال شخص هناكل شعريه امتي دا معناه هتتجوز امتي كمان بياكلوها في اعياد الميلاد تيمنا بالحياه الطويله الصحيه للطفل                                                                                          

*اخيرا هنتكلم عن اسوء عادات الشعب الكوري والي بتاثر بالسلب علي صحتهم و هي تناول المشروبات الروحانيه ال بيهتموا بتناولها في الاعياد و المناسبات و الافراح و العطلات و بيتفننوا في صناعتها لدرجه ان فيه هناك حوالي 300 نوع من المشروبات دي و اشهرها مشروب السوجو و هو عباره عن مستخلص كحولي من الحبوب و البطاطس الحلوه مضاف عليه بعض النكهات و الماء و فيه انواع تانيه كتير زي نبيذ العنب و نبيذ الكمثري و نبيذ الارز الي بيعتبر اشهر نوع بيتناوله الفلاحين

                                                                                                        

            نوران صلاح                                                                                                                                     Source/Book:Facts about korea